deur Braham van Zyl

DIE Sederberg se Biedouw vallei is reeds goed bekend vir sy blommeprag wat iedere lente daar kop uitsteek. Met dié dat die blomme die afgelope paar jaar maar swakkerig was, en die besoekersgetalle redelik opgedroog het, moes die mense daar rond ander maniere vind om mense daarheen te trek.

Barry Lubbe van die plaas Mertenhof vertel dat die idee van 'n 4x4 roete van Anton Boshoff van Base Camp gekom het. Coenie Moll van Cederberg 4X4 het ook gaan kyk en die roete is gebore. Ek het ook 'n draai daar gaan maak en was dadelik oortuig dat ons dieselfde roete met die 4x2's van die agterkant af sou kon ry. Ek en Barry het begin planne maak en dit net daar die Biedouw roete gedoop.

Die beste van daardie roete is dat dit oral bestaande ou plaaspaadjies volg. Synde in die Cederberg, kan besoekers beslis iets besonders verwag as hulle daarheen gaan. 'n Paar van ons is dan ook so 'n rukkie gelede met ons 4x2 ewenaarslot rygoed daarheen om te gaan kyk of ons daar sou kon ry.

Ons is sommer kort na die wegtrek deur 'n droë waterlopie en by 'n paar tradisionele ou Cederberg rietdak skaapwagtershuise verby. Net daarna het ons die eerste klipbanke teëgekom en moes ons die "diff-lock" knoppies druk om ons oor die kliptrappies te help. Ons rygoed is heelhuids daaroor, en so ook aan die anderkant tussen die renosterbosse af na die rivierloop toe, waar ons eers by 'n diep watergat uitgespan het.

Dat daardie waterpoele in die somertyd 'n ou goed gaan verfris vir die res van die roete is seker. Vandaar is ons oor nog meer klipbanke en deur 'n sterkerige stroompie verder die vallei af. Van die Biedouw Jeugkamp af het die sand ons ingewag.

Ek het iewers daar in die sandspoor effens eenkant toe gekyk en toe ek weer sien was ek die spoor uit, in die veld in met my ryding se neus wat terug kyk vanwaar ons gekom het. Dit het heelwat vernuf en hulp van die ander gekos om uit dié penarie te kom, maar kort-voor-lank was ons weer op die spoor.

Dit is duidelik dat daardie sand in die somertyd wanneer dit goed los sal wees sommer vir ure se pret gaan sorg en dat die 4x2 ryers hulle maar vir vassit kan regmaak. Daardie vassit is mos deel van die pret, want dis daar waar jy moet begin bande afblaas en planne maak hoe jy daar gaan deurkom. Ek sal egter aanraai dat die ouens wat so effens skrikkerig is vir die sand en ook vir die steilte wat daarna nog wag, by die jeugkamp moet terugdraai hardepad toe.

Die laaste stukkie sweet het kort voor die plaaswerf gewag. Ek was voor en toe ek weer sien staan my ryding se neus teen 'n lelike steil afdraend af. Vir my was dit amper iets soos daardie gevreesde Wupperthal 4x4 roete se afte; net heelwat korter. Ons het hoeka vroeër die middag oor die plaasradio gehoor hoedat Kobus Bosman 'n hele paar maal moes loop aanhaal om met sy 4X4 Mazda daar uit te kom.

Van omdraai was daar egter geen sprake nie, want my ryding was reeds met sy agterwêreld omhoog. Niks wat ek probeer het, kon sy agterwiele laat vasklou om my weer daar uit te trek nie. Daar was net een uitweg, en dit was vorentoe, al wou ek ook hoe graag omdraai. Ek moes maar net voetjie-vir-voetjie daar af. Was dit nie vir my jarelange veldryondervinding nie, sou my moed my sekerlik daar begewe het.

Die ander het gevolg en na wat soos 'n ewigheid gevoel het, was almal onder. Die laaste 200 meter huis toe was speletjies. Ons kon nie gou genoeg die stoep en die sonsondergang gaan opsoek nie. Daardie aand is daar ou stories om die vuur gesels deur die klomp "rofies" wat vir die eerste keer hulle 4X2's in die veld gehad het.

Dat hierdie sommer 'n uitsoek 4X2 roete is waaroor die hele familie tevrede sal wees, is seker. Die uiteindelike roete sal welliswaar nie oral gaan waar die 4x4's sal gaan nie, maar daar is oorgenoeg uitdagings vir beide die ouens wat nog nooit voorheen in die veld gery het nie en vir diémet baie ondervinding.

Sondagoggend vroeg is 'n paar van ons die steiltes uit om die son te gaan dagsê van een van die bergpieke af. Ons gaste was haastig om weer in die Kaap te kom en na ons gegroet het is ek en Barry daarvandaan verder die berge in om nog roetes te gaan soek. Daaroor gesels ons egter op 'n ander dag.

Besprekings vir hierdie Biedouw 4X2 roete kan by tel 021 975-6531 gedoen word. Onthou, daar is netjiese kamers met beddegoed beskikbaar, 'n goed toegeruste kombuis en groot sitkamer. Vir die kampeerders is daar kampeerplekke met warm storte en spoeltoilette. Dit alles is tot jou beskiking indien jy wil gaan seker maak of daardie 4x2 ewenaarslot bakkie van jou rêrig in die veld ook kan ry.